تبلیغات
قولاق آسمالیلار - مطالب بالاجا خوخان

لطفا Internet Explorer  فایدالانین

قولاق آسمالیلار

فیل و سیچان بالاسی

یازار: بالاجا خوخان   قونولار: آتام، 

فیل و سیچان بالاسی

ائندیر(دانلودMP3)

ائندیر(موبایل اوچون کلیب شکیلینده)

لاپ قدیملرده بالاجا بیر سیچان بالاسی وار ایدی. اونون بیر گوزگوسو (آینا)وار ایدی. بو گوزگو ساده گوزگو دئییلدی، سئحرلی(جادو) ایدی. کیم بو گوزگویه باخسا ایدی، اؤزونو بؤیوک و گوجلو گؤرردی. سیچان بالاسی دا همیشه اؤز سئحرلی گوزگوسونه باخار، اونا ائله گلردی کی، او ائله دوغرودان دا دونیادا تایی برابری اولمایان ان بؤیوک و گوجلو حئیواندیر. سیچان بالاسی او بیری سیچانلارا چوخ یوکسکدن باخماغا باشلامیشدی. اونلارلا اویناماق، حتی دانیشماق دا ایستمیردی.

او، کونجده اوتوروب لووغا-لووغا اؤز بیغینی تومارلایار، یا دا اؤز

جومبولو آیاقلاریله یئری تاپدالایاردی، قولاغینی تورپاغا قویوب قولاق

آساردی کی، گؤرسون آیاغی‌نین ضربه‌سیندن یئر تیتره‌دی، یا یوخ!

اونون هئچ آغلینا گلمزدی کی، دونیادا اوندان بؤیوک و گوجلو

حئیوان اولا بیلر.

باخین، بو سیچان بالاسی بئله تکببورلو ایدی! بیر دفعه‌ اونون تجروبه‌لی و قوجا سیچان اولان خالاسی دئدی:

- باجی اوغلو، باخ ها، احتیاطلی اول! هامی بیلیر کی، سن چوخ لووغالانمیسان و اؤزونو بوتون حئیوانلاردان گوجلو اعلان ائتمیسن.

آنجاق یادیندا ساخلا کی، سنین اؤیونمه‌یین فیلین خوشونا گلمیر.

- هله بیر فیل نه دیر؟ - دئیه سیچان بالاسی جیگیلده‌دی. - هانسی فیل؟

فیل نه دیر؟ اشی، اونو بیر بورا چاغیر گؤرک! من بیر گؤز قیرپیمیندا

اونونلا حسابلاشارام!

سیچان بالاسی‌نین خالاسی دونیادا چوخ عومور سورموشدو و چوخ

شئیلر گؤرموشدو. او، بیغالتی گولومسونوب دئدی:

- فیل، دونیادا ان بؤیوک حئیواندیر. ائله بیر حئیوان تاپیلماز

کی، اوندان قورخمامیش اولسون.

- اولا بیلمز کی، هانسی بیر فیل ایسه مندن قوتلی اولسون،

- دئیه سیچان بالاسی جاواب وئریب فیلی تاپماغا گئتدی.

او، مئشه تالاسیندا یاشیل کرتنکله‌یه راست گلدی.

- بیر دئ گؤروم، فیل سنسن؟ - دئیه سیچان بالاسی سوروشدو.

- یوخ، من کرتنکله‌یم. فیل سنین نَیینه لازیمدیر؟ - دئیه

کرتنکله ماراقلاندی.

- دعا ائیله کی، سن جانینی منیم الیمدن قورتاردین. اگر سن

فیل اولسایدین، من سنی پارچا-پارچا ائدردیم! - دئیه سیچان بالاسی

قیشقیردی.

بالاجا سیچان بالاسی‌نین ائله گولمه‌لی اوزو واردی کی، کرتنکله

اؤزونو ساخلایا بیلمه‌ییب گولدو.

سیچان بالاسی حیرصلندی، اؤز گوجونو اونا گؤسترمک اوچون آیاغینی

یئره ووردو. تصادفن گرک ائله ایلدیریم دا همین او آندا چاخا ایدی!

یاشیل کرتنکله قورخدو، تئز اؤزونو داشین آلتینا سوخدو. اونا

ائله گلدی کی، بو گورولتونو سیچان بالاسی قالدیریب.

“گؤر من نئجه گوجلویم!” - دئیه سیچان بالاسی دا بو آرالیق

اؤز-اؤزونه دوشونوب قاچدی.

بیر آز گئدیب بیر بؤجه‌یه راست گلدی.

- ائی، دایان، سن، تصادفن فیل دئییلسن؟ - دئیه اوندان سوروشدو.

بؤجک اؤزونو ایتیردی.

- یوخ، - دئیه دیلی توپوق چالا-چالا جاواب وئردی. - من فیل

دئییلم، بؤجه‌یم.

- اوندا سنین بختین گتیردی! سئوین کی، سن فیل دئییلسن. یوخسا

من سنین سور-سومویونو یئرله بیر ائتمیشدیم!

بؤجک بو سؤزلری ائشیدیب آنجاق گولومسوندو. اوندا بالاجا سیچان

بالاسی آیاغینی یئره ووردو کی، بؤجیی قورخوتسون. آنجاق بو

دفعه‌ ایلدیریم چاخمادی.

سیچان بالاسی آیاغینی یئره بیر ده ووردو، یئنه ده ایلدیریم چاخمادی،

هئچ بیر ضعیف سس ده چیخمادی!

“یقین کی، یئر یاشدیر. اونا گؤره سس چیخمیر!” - دئیه سیچان بالاسی

اؤزلویونده دوشوندو، قاچیب یولونا داوام ائتدی.

او بیر نئچه متر قاچمامیشدی کی، قریبه بیر حئیوانا راست گلدی.

او حئیوان آغاجین یانیندا اوتوروب یازیق-یازیق باخیردی.

“باخ، یقین کی، بو فیلدیر! - دئیه سیچان بالاسی دوشوندو. - او،

منی گؤروب، دویوب کی، من نه اوچون گلمیشم، اونا گؤره ده بئله

درده-قمه باتیب”.

- دئ گؤرک، سن فیلسن؟ - دئیه سیچان بالاسی مولاییملیکله سوروشدو.

حئیوان، سیچان بالاسی‌نین سوالینی ائشیدیب گولومسوندو و بئله

جاواب وئردی:

- یوخ، من فیل دئییلم، آنجاق من دونیا اوزونون آغاسی‌نین

دوستویام. من ایتم.

- بس او دونیا اوزونون آغاسی کیمدیر؟ - دئیه سیچان بالاسی سوروشدو.

ایت دئدی:

- اینسان!

- یوخ اشی؟ بختین گتیردی کی، سن ایتسن. اگر فیل اولسایدین، ایشین

یاشدی! آنجاق یادیندا ساخلا کی، دونیانین تکجه آغاسی منم،

اینسان دئییل! یاخشی اولار کی، سن اؤز سؤزلرینی گئری گؤتوره‌سن.

ایت ایسته‌دی کی، بو لووغانی بیر آز اله سالسین:

- سن دوغرو دئییرسن، گوجلو حئیوان! حتی اینسانلار دا سنین

اوچون ایشله‌ییرلر. اونلار تاخیل اکیب-بیچیرلر، سن ده اونو یئییرسن!

ایت بونو دئییب، قاچیب اؤز یولو ایله گئتدی.

سیچان بالاسی دا یولونا داوام ائدیب مئشه‌نین لاپ درینلیکلرینه

چاتدی. او، بورادا داغ بویدا بویو اولان حئیوانا راست گلدی، اونون

آیاقلاری آغاج گؤوده‌سی یوغونلوقدا ایدی، ایکی قویروغو واردی: بیری

اوزون - اؤزو ده قاباقدا ایدی، او بیری قیسا ایسه دالدا ایدی.

- اولمایا سن فیلسن؟ - دئیه لووغا سیچان وار گوجویله قیشقیردی.

فیل اطرافا باخیب هئچ کسی گؤرمه‌دی. سیچان بالاسی بؤیوک داشین اوستونه دیرماشیب چیخاندا فیل دقتله باخیب اونو گؤردو.

- بلی، من فیلم، - دئیه جاواب وئردی.

- سن نئجه جورت ائدیب منی اله سالمیسان و حیرصله حدله‌میسن!

- دئیه سیچان بالاسی قیشقیردی، آیاغینی داشا ووردو. بو دفعه‌ ده

ایلدیریم چاخمادی.

سیچان بالاسی‌نین غضبی فیلین هئچ دوداغینی دا قاچیردیب گولدورمه‌دی.

او، ساکیتجه خورتومونا سو آلیب حددینی آشان سیچان بالاسی‌نین

اوستونه تؤکدو. بیر گؤز قیرپیمیندا سو - اؤزونوؤیه‌نی داشین اوستوندن

یویوب یئره سالدی. سیچان بالاسی آز قالا سودا بوغولاجاقدی.

آنجاق بیر تهر اؤزونه گلیب گوج-بلا ایله نوهوردان چیخدی.

سیچان بالاسی هئچ گؤزله میردی کی، فیلله اونون داواسی بو جور روسوایچیلیقلا

قورتارار.

سیچان بالاسی سویو سوزوله-سوزوله ائوه قاییتدی. ایندی او بیلیردی کی،

دونیادا اوندان چوخ-چوخ قوتلی حئیوانلار وار. سیچان بالاسی او

واختدان بری داها بیر ده لووغالانمیر و اؤز گوجو ایله اؤیونمور.

اؤزونون سئحرلی گوزگوسونه ایسه اوندان سونرا بیر ده باخمادی!

رسام:ائلناز اودل

جوجه لریم

یازار: بالاجا خوخان   قونولار: ماهنی لاریم، 

درس گئدن بیر اوشاق...

یازار: بالاجا خوخان   قونولار: ماهنی لاریم، 

معلم

یازار: بالاجا خوخان   قونولار: آنام، 

 

ائندیر(دانلود)

 

معلم

بالاجا اوغلان ایدیم

ائویمیزده خان ایدیم

آلتی یاشیم بیتنده

مکتب واختی یئتنده

آتام منه کیف آلدی

منی یانینا سالدی

آپاردی مدرسه یه

آدیمی یازسین دئیه

آدیم کئچدی دفتره

باخیردیم قلملره

بیلمیردیم نه دیر یازی

نئجه یازیم کاغاذی

نئچه واخت گئتدیم اورا

قول قویدوم کاغاذلارا

یارینی بیلدیم داهی

شوکر ائله دیم آللهی

آدیمی یازا بیلدیم

یازینی یوزا بیلدیم

بونو کیم اؤیرتدی کیم؟

محبتلی معلم.

شعر :بهرام اسدی

ادبلی

یازار: بالاجا خوخان   قونولار: آنام، 

ائندیر(دانلود)

 ادبلی

سلام سلام اوشاقلار

 سیزه نئچه سؤزوم وار

ادبلیدیر چون آدیم

بالدان شیریندیر آدیم

سئویرلر منی هامی

چون وئریرم سلامی

ال-اوزومو یویارام

یئمکلری قویارام

فیرچالارام دیشیمی

قویمام قالا ایشیمی

اوست-باشیم تر تمیز

اودور کی اولدوم عزیز

شعر : بهرام اسدی

 

بیزیم داغلار

یازار: بالاجا خوخان   قونولار: آنام، 

ائندیر(دانلود)

بیزیم داغلار

دره لری یان- یانادیر،

بیزیم داغلار بیزیم داغلار

بولودلارلا هم خانادیر

بیزیم داغلار، بیزیم داغلار.

بولاقلاری سرین-سرین،

اویناغیدیر گؤزللرین،

عرشه آچیب اؤز اللرین

بیزیم داغلار، بیزیم داغلار.

اتکلری چادیر، چادیر

زیروه لری گؤیه چاتیر،

اولدوزلارا کمند آتیر،

بیزیم داغلار بیزیم داغلار.

هاشم طرلان(سئچیلمیش)

ساییلار

یازار: بالاجا خوخان   قونولار: آنام، 

ائندیر(دانلود)

بیر-ایکی

بیزیمکی

اوچ-دؤرد

قاپینی اؤرت

بئش-آلتی

داش آلتی

یئددی- سکگیز

فرنگیز

دوققوز-اون

قیرمیزی دون

قاتار

یازار: بالاجا خوخان   قونولار: آنام، 

 

ائندیر(دانلود)

قاتار

بورولور ایلان کیمی

نه سویو وار نه یئمی

سیقنالی وار اوو-اوو

 یول گئتمه یی دوو دی دوو

(تپه لردن یئل کیمی

دره لردن سئل کیمی)

گئدر مقصده چاتار

آدین ایسته سن قاتار.

شعر : بهرام اسدی

مکتبلی قیز

یازار: بالاجا خوخان   قونولار: آنام، 

 

ائندیر(دانلود)

مکتبلی قیز

من مکتبلی بیر قیزام

دئمه یین ساوادسیزام

ائویمیزده آیپارا

مکتبده بیر اولدوزام

قیرمیزیدیر جورابیم

شکیللیدیر کیتابیم

خانیم هرنه سوروشسا

اونا واردی جوابیم

گؤزل گؤیچک بیر قیزام

 گول قیزام چیچک قیزام

اوست-باشیم تر تمیز

تئللری ایپک قیزام

یومورو یول گئدیرم

درسی ازبر ائدیرم

اؤز مهریبان انامی

 هاچان من اینجیدیرم؟

شعر : بهرام اسدی

خوروز

یازار: بالاجا خوخان   قونولار: آنام، 

 

ائندیر(دانلود)

خوروز

آ پیپیگی قان خوروز,

گؤزلری مرجان خوروز!

سن نه تئزدن دورورسان,

قیشقیریب بانلاییرسان?

قویماییرسان یاتماغا,

آی جانیم, مستان خوروز!

شعر : عبدالله شایق

کئچی

یازار: بالاجا خوخان   قونولار: آنام، 

ائندیر(دانلود)

کئچی

آلا-بولا, بوز کئچی,

آی قوشا بوینوز کئچی!

یالقیز گزمه, دولانما,

داغا-داشا دیرمانما.

بیر قورد چیخسا قارشینا,

سن نه ائدرسن اونا?

چوبان آچینجا گؤزون,

قالار ایکی بوینوزون.

شعر: عبدالله شایق